韓國首爾之旅

真係煩，之前個日記down鬼左，依家又ok番…

返來香港嚕，不過好唔捨得韓國，講真，我真係好鐘意韓國既生活，好寫意，最重要既係呢個時候韓國唔熱，好涼爽!! 返來香港之後，夜晚用左個半鐘頭跑步，近排又操番畫畫。

個人旅遊小記第三回 – 首爾之旅

~~~~~~~~~~~~~~~~~~~~~~~~~~~~

Day 1 28/5/2005

家姐, 細妹同埋我第一次三姊弟妹出外旅行，去既地方係首爾。由於班機係29號凌晨出發，於我地就8點三出門口，搭火車去大埔，然後再坐E41去機場。坐機場巴士坐左個半鐘，十點左右就到左機場，跟住就響H 區等領隊。領隊姓蘇，英文名叫Billy。等領隊搞好登機手續之後同行李d寄倉之後，閑逛機場d 商店。咁上下時間就出境，再行下d 免稅店，跟住等到咁上下就上飛機。我地坐既飛機係韓亞航空，d 空姐姐姐有幾個巧令女架!!!

(29/5/2005)

o係隻機度混混噩噩，四五點左右抵達仁川機場，仁川o係首爾隔離。介仁川機場好靚，好簡約，唔似香港咁花巧，d商舖多到死，仲要整埋d九曲十三彎。而仁川機場既設計簡單直接，商店都係依住一條路咁設立。

一離開仁川踏足韓國國土後，感覺好清涼，而且五點幾既時候經已出太陽。之後就坐旅遊巴過去首爾。團友有老有嫩，不過當中三個歐巴桑都幾煩。第一站係去華克山莊。華克山莊係一個賭場仔，我都係第一次去賭場咋，澳門果個都未去過，遲d要去下先!!!

第二站係長今村，入面唔單只係拍長今的場地，醫道、商道同茶母都係響果度取景。呢條古裝村都幾靚架!!

去完長今村，跟住就食晏晝，晏晝食既係人蔘燉雞湯，雞係用小朋友雞黎煮，所以好好食，好嫩口。人蔘湯湯味滲入雞肉，d雞肉根本唔駛醮任何醬油，清新既味道真係難以言諭。成碗湯都飲哂。

食飽飽之後去行街，行木洞名牌街，條街d街柱好多電纜鋪住，入面多數有哂d 名店，好似addidas, nike, levis’…..總之咩都有，價錢比香港o既略為貴，款式又冇香港咁多，所以我冇買過衫。跟住就行埋東大門，我地主要係響東大門入面一間叫Goota!的商場行，成橦大廈，最頂係食野同飲野，最低消費都要2500圜。地下賣野食，一樓至五樓都係賣衫。可能入面太迫、太多人，冇咩心機睇。不過Goota!出面有d 野吸引途人去睇，就係一d小朋友o係度唱歌，事關門口旁搭左個台，好似係d咩咩唱歌比賽，好多小朋友同家庭都有參加，吸引左一大批人黎，果度真係好旺，不亞於旺角。

夜晚去食石頭飯。初初以為石頭飯即係o係石頭上煮飯，原來只係估o岩左一半，石頭係指用石頭做的碗，當一碗碗石頭飯捧出黎，就聽到d咋咋聲，好鬼死熱咁。飯面頭打左隻生蛋。真係好好食呀!!!!

食完夜晚之後，我地入住Crown酒店。呢間酒店響正美軍軍營果區，亦即係交通最繁忙果區。

————————–

Day2 30/5/2005

今日主力去的地方是夢幻樂園。夢幻樂園就即係紅豆女之戀取景的地方。我同家姐細妹用左40,000圜買遊戲門票，裡面包括夢幻樂園BIG5同樂天世界BIG3，因為兩間遊樂場係有關係，要買飛就一定要兩間一齊咁買。

入得去夢幻樂園，梗睇的當然係獅子老虎同獅虎或者虎獅。雜種始終都係雜種，冇原來的咁好睇。

o係夢幻樂園度，我只係玩左一個激遊戲，就係美洲冒險的過山車，真係好爽，另外果個我唔敢玩(成個夢幻樂園有兩個過山車)。其餘果四個game就揀d比較靜態的遊戲，好似摩天輪、纜車、動感映院等。晏晝o係最多人食的餐廳用餐，食烏冬set，好好吃!!!!

最正係夢幻樂園入面有間叻高專門店，我買左兩盒，一盒星戰系列，一盒係西部走仔系列，兩盒加埋有六隻人仔，賣9,500圜，為起港紙都係七十幾蚊，抵過去豆豆城買，最重要係豆豆城冇呢D舊SET賣。

去完夢幻樂園之後去南山公園，南山公園係紀念行刺伊膝博文的安重根，佢曾經俾人嚴刑虐待，無名指俾人切斷。佢個手印刻左響個紀念碑，好似黃花崗咁，俾後人當係烈士咁憑弔。入面除左個水池就真係冇咩野睇。

跟住去埋南山韓屋村，呢個景點都o係南山入面，所以離開南山公園坐五分鐘車就到。呢個韓屋村係一個典型的韓國傳統屋宇，格局好簡約，我最鐘意就係個大廳。大廳佈署得好簡單，坐上去好舒服，冇檯凳，覺得好開揚。

晚餐去食烤肉，只有豬肉冇牛肉。因為牛肉響韓國入面黎講係一d高級食品，所以普遍烤肉店只有烤豬肉。呢餐就真係so far so good啦。

———————–

Day3 31/5/2005

一早起身坐車去一間中華料理食野，食粥呀，夠清淡。跟住就戰爭紀念館，戰爭紀念館入面有好多飛機大砲。不過最吸引我去影相就係坦克，紜紜坦克中，我揀左影老虎坦克，我嫌大陸果d太柒。我覺得最搞笑的莫過於南北韓士兵兼兩兄弟相擁的石像。因為兩兄弟身高懸殊，而南韓就話高果個係南韓，而矮的就係北韓。

聽講兩兄弟在戰場相遇，而且更成為敵人，係真人真事。太極旗飄揚就係依照呢個故事作為藍圖。um….有機會我會租番太極旗飄揚睇。

午餐食d好平常既野，一碗所謂烏冬其實係一碗米線同一碗飯。之後行Coex購物城，Coex購物城主要係一個地底商場，入面好鬼死大。我響入面行左兩間百貨公司，一間cd鋪，本來以為cd應該會比香港賣的平，但係睇番價錢，居然同HMV差唔多，於是打消左買CD的念頭。

繼續行街，下一個行程係新村女子大學街。裡面賣的多數係女仔衫同化妝品，所以我就覺得有D悶蛋，而且仲好肚餓，響街邊買左個MINI PIZZA，都係千五圜

。

五點鐘入樂天世界玩，玩BIG3(即係揀三隻GAME玩)。雖然呢個室內+室外遊樂場好令，但係由於太累，冇咩意欲去玩。坐下觀光火車同氫氣球。玩哂D GAME又行下商場，入面都好多商場，最主要係樂天世界出口連住一個大型商場，真係好多野睇，行完LOTTE DEPARTMENT STORE，再行LOTTE SUPERMART，兩間野賣的野差唔多，不過LOTTE SUPERMART大眾化好多。我買左盒OXFORD積木，香港冇得賣架，係一盒軍車。

行累加上肚餓，於是四處覓食，搵到間餐廳仔，買石頭飯食。飯表面有蟹子，食落去好有口感。成個SET賣6,000圜，我覺得算係抵食啦。

—————————-

Day4 1/6/2005

首爾之旅的最後一日，行程仍然豐富。趕完過好普通的早餐，就過梨泰院行，梨泰院響酒店隔離，所以路程唔遠。沿途見到街上一D地方出面有D黑衣人把守住，據導遊講，呢D黑衣人係警衛部隊，佢地全身黑衣打扮，帶住頂黑色CAP帽，再拎住把黑柄的武士刀，好鬼死型，其中有個坐響樹下，成個武士咁款。導遊話呢D部隊主要係守衛美軍基地。

梨泰院賣的就好似香港女人街o既野，好多假T-shirt同工藝品。d女人走哂去睇LANEIGE。我就行下D小街小巷。

離開梨泰院，就去南大門。南大門賣的係D平價野，但今次我地主要行的係南大門旁的明洞，明洞又係一條包羅萬有的街，衫褲鞋襪食物都有。

未行明洞之前，走去搵野食先。我地響明洞入面一間日式料理度食，我叫左個烏冬set，五千圜，一碗烏冬加七件魚生壽司，呢餐係成個行程最好吃同最超值的一餐。

我入左去明洞Department Store。入面賣的野好平，T-shirt果層，有一個位，d衫都係賣7800圜，不過件件都太細，唔o岩我著，而且睇唔o岩，結果冇賣到。

去到兩點零鐘左右，去食32cm長的雪糕，1,000圜o者，我地三姐弟妹一人一個雪糕。我仲同其中一個歐巴桑團友講，o係香港邊有咁長既雪糕食，響ok同7-eleven叫個姐仔轉多個圈(雪糕)，佢就叫你不如買多杯囉。

行完明洞就要去一d所有團必有既地方，人蔘、冬蟲夏草同水晶店，冇野好講。之後到手信店買手信，賣左好q多雞泡魚干，總共15,000圜，亦係我將會送俾朋友同學的手信，流口水等住啦~我同家姐o爹過，結果忍唔住買左盒kimchi，kimchi用食物盒入住，都幾方便，咁就8,000圜。

行哂所有行程，跟住坐車去仁川機場返香港。

——————————-

終於將水蛇春咁長的旅程寫哂出黎，今次首爾之旅雖然係跟團，但係我對導遊同領隊好滿意，行程安排都好周到。最值得一讚就係導遊講野技巧好犀利，我聽聽下mp3都忍唔住扔下耳塞去聽佢講野。佢教曉左我好多韓文!!

好似:

“ar noon ha say yo” =你好

“我要買野哦“=幾多錢

“pizza yo”=太貴了

“sa爹“=平d啦

“suga ha say yo”=辛苦您了

“cum see mi da”=多謝了

“yip ball yo”=靚女

“報紙“=女性生殖器官(別誤會呢d係我特登上學既野，導遊係女仔，佢話之前有d

團友入去便利店度講，俾人聽到，令到售貨員好尷尬。)

“雜誌“=男性生殖器官

“朱姑呢“=想死呀?

總結，韓國的確有好多令女，不過個個個樣都好似差唔多，有d睇得出係整個容。韓仔普遍都好高大健碩，我唔敢拍埋去比。